O trango

Agradeximiento a APUDEPA

2012-02-11T03:45:00.001-08:00

Dende l'Asoziazión Cultural O Trango queremos agradexer a Acción Pública para la Defensa del Patrimonio Aragonés (APUDEPA) o suyo refirme en os nuestros contautos ta mirar de meter a toponimia bilingüe en as etapas d'a Buelta Ziclista a España que pasen por lugars do se mantienga con mayor u menor bitalidat dos soluzións toponimicas, y ta mirar d'incorporar un premio d'a mosica estatal en calidat de "Premio a la millor canta en luenga aragonesa".

As dos son custións que ya se fan serbir t'atras luengas de l'estau, ofiziáls como lo basco, catalán u gallego, y no ofiziáls como l'asturiano. Ta mirar d'incoporar-las ta l'aragonés somos fendo serbir o material lechislatibo d'o que disposa ista luenga, más que más a Ley de luengas encara no derogada.

Istas midas ya estión reflexadas en a entrebista que Arredol fazió a un d'os miembros d'O Trango.

L’Asoziazión Cultural O Trango conbocará una manifestazión en marzo

2012-01-16T05:41:00.000-08:00

Comunicau de prensa de l’Asoziazión Cultural O Trango

L’Asoziazión Cultural O Trango da a conoxer, a trabié d’o presén comunicau de prensa, a suya intenzión de conbocar una manifestazión con calendata en o benién mes de marzo en o caso de que a modificazión d’a LEY 10/2009, de 22 d’abiento, de emplego, protezión y promozión d’as luengas propias de Aragón resulte prechudizial ent’as luengas d’a Comunidat Autonoma d’Aragón.

Consideramos prechudizial toda Ley que no s’amuestre acorde con os criterios lingüisticos d’as instituzions y personalidaz de ran autonomico, estatal y internazional, que si aigan amostrau más competéns y conoxedoras d’a reyalidat lingüística aragonesa.

De bez, creyemos negatiba toda modificación que establezca una esferenzia de trato dentre os tres diasistemas lingüisticos d’Aragón. Asinas que no azeutaremos una politica lingüística zentrada en as modalidad dialeutals ta bels conchuntos lingüisticos, y una modalidad estándar ta l’atro (castellano d’Aragón). Tampoco no azeutaremos que se de un trato de “no imposición” ta unas luengas y d’obligazión t’atras.

Creyemos asinas mesmo que debán d’ista baralla be d’optar-se por a potenziazión de modelos estandares, que a suya normalizazión be de promober-se debán d’o fomento d’as bariedaz: garra luenga d’una soziedat ozidental ye planificada arredol d’as suyas bariedaz, sino arredol d’una modalidat estándar, y fer-lo al biés, suposaría a reyalizazión de metodos d’amostranza, formularios administratibos y una aparexedura en meyos de comunicazión publicos, de todas as bariedaz diatopicas. Ello suposaría bosar un gran pre ta diasistemas en os que os fabladórs d’as modalidad no tienen dificultaz ta entender-se.

Ta rematar, be de remerar-se que a Ley de Luengas d’Aragón no cumple os requisitos desichius por a Declarazión Unibersal de Dreitos Lingüisticos dita por a UNESCO, que en o suyo segundo tetulo, articlo 15, primer punto, diz: Toda comunidat lingüística tiene dreito a que a suya luenga siga feita serbir como ofizial dentro d’o suyo territorio. Dende l’Asoziazión Cultural O Trango no s’azeutará garra modificazión d’a Ley de Luengas que no cumpla os mandatos d’iste documento.

Por o esposau d’antis, l’Asoziazión Cultural O Trango anunzia a suya intenzión de conbocar una manifestazión si a modificazión d’a Ley de Luengas d’Aragón anunzia que l’autual gobierno autonomico no fa caso d’os criterios d’a comunidat inteleutual y lingüística, discrimina en fabor de bellas luengas debán d’atrás y no cumple o requisito d’ofizialidat.

A.C.OTrango

otrango@gmail.com

Telefono de contauto: 651115755

Curso d'aragonés 2011 - 2012

2011-10-22T05:33:00.000-07:00

Quiers aprender aragonés?

La Asoziazión Cultural O Trango prenzipia o curso escolar 2011/2012 ufrindo clases d'aragonés de primer ran ta todas as edaz. O curso estará os biernes, de 7 a 9, en a 'Casa de Chobenalla Unibersidá'; Andador de los Hudíes, nº 15 (ye alcanto d'un Eroski).
O pré total d'o curso estará de bels 10 euros (en conzeuto de materials).

Animate a aprender ista polida luenga!

Orario y durazión: biernes de 19:00 ta 21:00 mientras tot o curso academico.

Puesto: Casa de Chobenalla Unibersidá, carrera Andador de los Hudíes, nº 15

Pre: Gratuito (en tot caso nomás caldrá bosar os materiáls escolárs: bels 10 euros).

Contauto: otrango@gmail.com; cjuniversidad@gmail.com. U bien os telefonos, 976559052 u 651115755.

------------------------------------------------------------

¿Quieres aprender aragonés?

La Asociación Cultural O Trango empieza el curso escolar 2011/2012 ofreciendo clases de aragonés de primer curso para todas las edades. El curso se impartirá los viernes, de 7 a 9, en la 'Casa de Juventud Universidad'; Andador de los Hudíes, nº 15 (está al lado de un Eroski).
El precio total del curso será de unos 10 euros (en concepto de materiales).
¡Anímate a aprender esta bonita lengua!

Horario y duración: viernes de 19:00 a 21:00 durante todo el curso académico.

Lugar: Casa de Juventud Universidad, en la calle Andador de los Hudíes, nº 15

Precio: Gratuito (en todo caso sólo hará falta pagar el material escolar: unos 10 euros).

Contacto: otrango@gmail.com; cjuniversidad@gmail.com. O bien los telefonos, 976559052 o 651115755.

O despertar de l'onso - Chenerazión literaria en aragonés

2010-12-12T06:01:00.000-08:00

Toda luenga poseye una istoria y toda istoria poseye una literatura. L’aragonés no ye menos, guarda una historia y una literatura enreligada a la mesma, y guardará un esdebenidero si ista relación no se creba.

Baxo ista ideya, una colla de diez chobens narradórs nos emos achuntau y emos feito treze relatos, treze sueños que quieren alportar un grano d’arena en a perbibenzia d’a luenga aragonesa, pos no se puet fer futuro sin presén.

Toz nusatros prenzipiemos fa tiempo a fer camín en o mundo de l’aragonés. Os diez nos emos achuntau arredol d’a ideya de que l’aragonés no ye una luenga muerta y que como un onso dimpués de l’ibierno, dimpués d’o silenzio, rebellará. Somos naxius d’os güitanta, somos una buena muestra d’ello.

Y como amostranza d’iste empeño, surche O despertar de l’onso, primer treballo d’ista nueba chenerazión, feito por treze relatos que dan buena fe de que bi ha esdebenidero t’a luenga aragonesa.

A presentazión d’ista obra se ferá o diya biernes 17 d’abiento, a las 19:00 en a Librería-Zentro Social La pantera rossa, en o numero 28 de San Bizén de Paúl.

Puesto: Librería-Zentro Sozial “La pantera rossa”
Calendata: Biernes 17 d’abiento, a las 19:00.

CURSO D'ARAGONÉS

2010-10-17T08:26:00.001-07:00

Curso d’aragonés 2010-2011

Atra añada más, l’Asociación Cultural O Trango torna a ufrir a posibilidat d’aprender aragonés. Feremos un curso de primer ran, an que podrez aprender l’alazet d’a gramatica d’a luenga aragonesa asinas como o bocabulario más importán. Tamién se ferán charradas tocán a la sozializazión y situación autual d’a luenga, cantas, chuegos y bella cursa.

•Puesto: Casa de Chobenalla d’o Zentro Zibico Unibersidat
•Orario: Biernes de 19:00 ta 21:30
•Pre: 20 euros por trimestre (en son 60 tot o curso). I son os materiáls.
•Más informazión: 976 559 052 (telefono d’a Casa de Chobenalla) – 651115755 (telefono d’o responsable d’o curso)
•Inscripzión: cjuniversidad@gmail.com

No dandalees!

------------------------------------------------------------------------------------

Curso de aragonés 2010-2011

Otro año más, l’Asociación Cultural O Trango vuelve a ofrecer la posibilidad de aprender aragonés. Haremos un curso de primer nivel, donde podréis aprender la base de la gramática de la lengua aragonesa así como el vocabulario más importante. También se harán charradas respecto a la socialización y situación actual de la lengua, canciones, juegos y alguna excursión.

•Lugar: Casa de Juventud del Centro Cívico Universidad.
•Horario: Viernes de 19:00 a 21:30.
•Precio: 20 euros por trimestre (son 60 todo el curso). Los materiales están incluidos.
•Más información: 976 559 052 (teléfono de la Casa de Juventud) – 651115755 (teléfono del responsable del curso)
•Inscripción: cjuniversidad@gmail.com

No dudes!

Seminario d'Azercamiento a la Luenga Aragonesa

2010-07-25T04:25:00.000-07:00

L'Asoziazión Cultural O Trango prenzipia un Seminario d'Azercamiento a la Luenga Aragonesa en a Casa de Chobenalla d'o Zentro Zibico Unibersidat de Zaragoza

Istas chornadas se ferán en a Casa de Chobenalla d'o Zentro Zibico Unibersidá mientras os diyas 27,28 y 29 de chulio. En ellas, os temas prinzipáls serán a eboluzión istorica d'a luenga aragonesa, a situazión autual d'a luenga aragonesa y a problematica d'a luenga aragonesa. Antimás s'esplanicarán belunas d'as carauteristicas elementáls d'o lexico y a gramatica de l'aragonés, y se ferá una introduzión a la literatura, mosica y manifestazións artisticas en cheneral de l'aragonés.

Ditas chornadas prenzipiarán a las 19:30 y rematarán a las 21:00, estando o pre de cadaguna d'ellas 3 euros.

Telefono de contauto: 651115755
Adreza de correyo eleutronico de contauto: otrango@gmail.com

Charraire Fest en Pandicosa

2010-05-30T08:22:00.000-07:00

Puesto: Pandicosa
Calendata: 12 de chunio de 2010

Tos animamos a ir t'a borina d'as luengas d'Aragón, o CharraireFest, an que todas as asoziazións nos achuntaremos ta pasar-lo bien y fer autibidaz en y por a nuestra luenga.

Dende O Trango feremos una charradeta ta mirar de amostrar y obtener argumentos en esfensa de l'aragonés en situazións cutianas d'as nuestras bidas.

Comunicau de l'Asoziazión Cultural O Trango debán d'o retraso en a formazión d'o Consello Superior d'as Luengas d'Aragón

2010-05-01T14:54:00.001-07:00

O pasau 22 de diziembre de 2010 s'aprebó en as corz aragonesas a Lei d'Uso, Protezión y Promozión d'as Luengas Propias d'Aragón, que a suya finalidat ye a d'establexer un marco churidico apropiau que ature o contino reble que istas luengas, y más que más en o caso de l'aragonés, bienen sufrindo dende fa sieglos.

Iste documén lechislatibo, entrau en bigor en chinero de 2010, establexe como un organismo fundamental en o cumplimiento d'a suya funzión, o clamau Consello Superior d'as Luengas d'Aragón, y d'a mesma traza esposa que iste be d'estar formau antis de pasaus os 3 meses d'entrada en bigor de dita lei, lo que a efeutos prauticos se corresponde con o diya 30 d'abril.

Pasau iste diya nos trobamos con que dito Consello no s'ha formau, y asinas mesmo no bi ha garra indizio de que s'establexca en breus. Ye por ello por o que dende l'Asoziazión Cultural O Trango denunziamos a irresponsabilidat d'o Gubierno d'Aragón en no cumplir os plazos establexius por Lei, y estando en iste caso de bital importanzia o toma de midas direutas y d'o estableximiento d'una planificazión luego y adecuada ta ebitar a muerte d'a luenga aragonesa.

Mientras istos zaguérs 30 años emos bisto que debiu a la manca d'una politica lingüistica y a o incumplimiento de documéns azeutaus por o estau español, como a Carta Europea d'as Luengas Minorizadas u a Declarazión de Dreitos Lingüisticos d'a UNESCO, o Gubierno d'Aragón ha iu dexando morir as luengas d'o territorio an que tiene churisdizión. Tras l'aprebazión d'a Lei de Luengas un alo d'asperaza s'ubriba enta ixos que no queremos que iste riquizo bien cultural muera, pero o nuestro desengaño se fa más patén mientras se compreba que a os 3 meses d'entran en bigor a Lei de Luengas, ya de por sí poco angluziosa, ni sisquiera se cumple.

Ye por ixo por o que a tarbiés d'o presén comunicau femos un clamamiento a la soziedat aragonesa, de bez que pretendemos informar-la, ta que entre toz paremos cuenta d'ista reyalidat y miremos de cambiar-la.

Asociación Cultural O Trango

Campaña "Informazión Lingüsitica" en o diya de San Chorche

2010-04-21T14:07:00.001-07:00

L'Asoziazión Cultural O Trango torna a fer a fer a campaña "Informazión Lingüistica" aprobeitando o diya de San Chorche.

Asinas, iste biernes de maitíns en o Paseyo Indepenzia de Zaragoza con a masiba afluenzia de chen motibada por a feria d'o libro y toz os autos que se i fan, espardiremos 1000 fuellas que pretenden dar una informazión cheneral d'a luenga aragonesa, tanto istorica como autual, a la soziedat aragonesa.

Dimpués de 2000 fuellas dadas, 1000 en Zaragoza, 500 en Uesca y atras tantas en Teruel, y tras pasar as rigórs de l'ibierno, tornamos t'a carrera con a fin de amostrar a existenzia d'un intrés por a salbazión d'o patrimonio lingüistico aragonés y de conzienziar a la chen d'o mesmo.

"Informazión Linguistica" iste domingo en Uesca

2010-01-08T15:29:00.000-08:00

O Trango contina a campaña “Informazión Lingüistica”, iste domingo en Uesca

L’Asoziazión Cultural O Trango tornará t’a carrera ta continar con a campaña “Informazión Lingüística” iste domingo 10 de chinero de tardis en Uesca.

Dende as 17:00 s’estendillarán 500 fuellas d’informazión cheneral por a redolada istorica d’a ziudá, o coso, o parque y arredóls, con as que se mirará de fer reflexionar a la poblazión oszense sobre o feito lingüistico aragonés. Tamién s’ufrirá informazión más personalizada a tot ixe que amuestre intrés u lo demande.

Dende O Trango cotinaremos con ista campaña, en beyer o notable exito que ha teniu dende que la prenzipiemos.

Chornadas d'iniziazión a la luenga aragonesa

2010-01-05T05:05:00.000-08:00

L'Asoziazión Cultural O Trango prenzipia l'añada ufrindo a posibilidat de fer unas chornadas d'iniziazión a la luenga aragonesa, con as siguiéns carauteuristicas:

Puesto: Facultat de Filosofía y Letras d'a Unibersidat de Zaragoza (Aula VI, a confirmar)
Orarios: Biernes de 19:00 ta 21:00, prenzipiando o diya 15 de chinero y salbando semanas d'examens y festibos.
Pre: materiáls.
Sesións: 11 enamplables a 15.

Dito curso se podrá enamplar con charradas de chen relebán en l'aragonés mientras as zagueras añadas, y a suya estrutura será más propia d'un seminario d'iniziazión.

Se tratarán tanto temas puramén lingüsiticos como atros soziolochicos y istoricos, toz arredol d'a luenga aragonesa.

Inscripzión en a cuenta de correyo eleutronico otrango@gmail.com.
Telefono de contauto: 651115755

Comunicau de l’Asoziazión Cultural O Trango debán de l’aprebación d’a Ley de Luengas

2009-12-19T07:29:00.000-08:00

Comunicau de l’Asoziazión Cultural O Trango debán de l’aprebación d’a Ley de Luengas

O pasau chuebes 17 de diciembre estió aprebada en as Corz aragonesas a primera, y asperemos que no zaguera, Ley de Luengas aragonesa. Ye una Ley de minimos, que si bien reconoxe de traza legal a existencia de l’aragonés en Aragón, no cumple con a Declarazión Unibersal de Dreitos Linguisticos, documento alazet en a elaborazión d’un marco churidico ta una luenga, y que diz: “Toda comunidat lingüistica tiene dreito a que a suya luenga siga feita serbir como ofizial dentro d’o suyo territorio”. Con ista Ley ixa ofizialidat no queda explizita y dixa muita marguín a o gubierno que pertoque a fer u no fer o que quiera.

Manimenos, dende O Trango consideramos que ista Ley ye positiba, en creyar un primer marco legal y dotar de uns primers dreitos a os fabladors d’as luengas d’Aragón, podendo estar o prencipio d’una nueva puenda ta istas, dimpués de sieglos de decadenzia y discriminazión.

Dende O Trango treballaremos siempre por a sozializazión y reconoximiento total d’os fabladors de luenga aragonesa, y dende agora se ubren dos bías ta fer-lo, y en as cualas profundizaremos. Una primera ye a reibindicación d’una millora en a situazión de l’aragonés en a lechislazión y en as entidaz publicas, a cuala ye de prebeyer que millore dende agora, pero no d’a traza que ye menester, que no ye atra que a de l’ofizialidat, o reconoximiento direuto de fer serbir una luenga en igualdat de condizions a la resta que i son charradas. L’atra ye a de mirar de sacar o mayor treslau posible a ista Ley.

Asperamos que ista Ley no burocratice a os entes treballadors por as luengas d’Aragón, perdendo fuerza l’aizión sozial, que ye a que nos ha feito plegar dica aquí. Por ixo, dende O Trango animamos a la resta d’entidaz que treballan por l’aragonés a que no pierdan ixe esprito nunca, baxo garra motivo.

Ta rematar, femos una critica a cómo s’ha planteyau l’asistenzia de publico a o debate más importán d’as luengas d’Aragón, an que no podión estar-ie toz os que quereban y merixeban, en no aber prous posientos. Ditos posientos estión reserbaus a personas d’a esfera politica que a suya aizión por as luengas d’Aragón ye estada infima en contiparación con a chen que, sin garra mena de personalismo u ego, ha saliu ta carrera, ha feito cursos u ha apegau cartels mientras istas ya más de 30 añadas estando en ocasons criminalizaus por l’onico feito de fer una mesa informatiba.

Asociación Cultural O Trango

otrango@gmail.com

"Información lingüistica" en Paseyo Independencia

2009-12-11T07:16:00.000-08:00

Iste domingo 11 de diciembre O trango continará con a campaña Información lingüistica, ista vegada tornando ta zaragoza, y fendo servir como puesto de autividá uno de os sitios más emblematicos de ista, o Paseyo Independencia.

Se tornarán a estendillar 500 fuellas de información cheneral de l'aragonés y se mirará de fer reflexionar y creyar una mica de debate entre as personas más intresadas.

Cal decir que ista mena de aicións ye tenendo asabelo de exito, en estar o tema de a Ley de Luengas tan presén en os meyos y a sociedá, y se troban opinións de toda mena, positivas y negativas, pero o que nunca no desintrés u desconoximiento de tot.

Teruel: atra aturada de a campaña "Información lingüistica"

2009-11-26T00:55:00.000-08:00

Dimpués del exito de o prencipie de a campaña "Información lingüistica" o martes 23 en o Campus Universitario de Plaza San Francisco (Zaragoza), an que se en estendillón 500 fuellas de información cheneral del aragonés, la Asociación Cultural "O Trango" continará ista campaña en Teruel.

O domingo 29 de noviembre a las 12:00 se estendillarán atras 500 fuellas en o centro de Teruel.

O Trango destaca a buena acullida que tenión istas fuellas en a primera aturada, en plaza San Francisco do prauticamén todas las pillón y, estando en contra u a favor de a custión lingüistica, en opinón y chenerón debate.

Campaña 'Información lingüistica'

2009-11-22T14:51:00.000-08:00

Iste martes 22 de noviembre a las 17:00 l'asociación 'O trango' iniciará a campaña 'Información lingüistica' a traviés d'a cual se pretende dar una mica d'información tocán a la luenga aragonesa de traza personalizada a la chen a traviés d'o reparto de pasquins y fuellas informativas, y de bella charradeta d'información cheneral.

A campaña prencipiará en o campus universitario de Plaza San Francisco y en ixe diya s'entendillarán 500 fuellas entre a comunidá universitaire. En diyas posteriós s'irá repetindo a mesma aición en esferens puestos de Zaragoza y d'a cheografía aragonesa. En toz os casos os miembros d'a campaña ufrirán información a tot ixe que siga intresau en conoixer más a fundo a situación d'as luengas d'Aragón.

Comunicau 9.11.2009

2009-11-09T09:42:00.000-08:00

Dende 'O trango' queremos comunicar con istas letras o siguién:

1. En primeras demandamos sincusas por a canzelación d'a cursa planeyada o domingo 8 de nobiembre t'os galachos de Chuslibol. L'orache no nos permitió ista begada fer l'autibidat prebista, pero en pocas semanas tornaremos a presentar bella autibidat.

2. Somos parando un biache t'os Carnabals de Bielsa. Toz os que sigan intresaus en puyar-ie ez de nimbiar-nos un e-mail a otrango@gmail.com. Os carnabals prenzipian o biernes 12 de febrero, y miraríanos d'estar tot o cabo de semana, salindo biernes y tornando o domingo. Antis d'Abiento fería onra tener planteyau o biache y a reserba.

3. Debán d'a conbocatoria de reunión por parti d'a Coordinadera Aragón Trilingüe, dende 'O trango' comunicamos que no i participaremos en trobar-se en ista o partiu politico Chunta Aragonesista, que ya fazió serbir ista coordinadera t'os suyos intreses partidistas. Dende 'O trango' explicitamos que o nuestro treballo no ferá honra ta sacar botos a fabor de dengún.

Autividá Noviembre 2009: cursa ta o galacho de Juslibol

2009-10-31T10:14:00.000-07:00

O venién domingo 8 de otubre o coleutivo 'O trango' organiza una cursa ta os Galachos de Juslibol, uno d'os puestos naturals amanaus ta Zaragoza.

Se quedará en a puerta de o Carrefour-Prica a las 11:30 am y se chentará en zonas proximas a o Galacho.

Transporte. Existen varias trazas de iye:
1. Bicicleta: ye a opción más versátil y recomendada. O trayeuto ye curto y no tiene dificultá, rai o fisico.
2. Autobús 43. Se pilla en a puerta de o Carrefour-Prica y plega t'a plaza mayor de Juslibol. Dimpués dica os galachos bi ha un troz de 20 minutos.
3. Auto: Cal dixalo antis d'o galacho. Bi ha un troz de 15 minutos a pie. No ye una opción recomendada.
4. Tren o carrizal. En noviembre ye disposable cada meya hora de 10:00 ta 13:00 y ta tornar dica as 18:00. Si bi ha prou chen intresada o coleutivo 'O trango' reservará plazas. O suyo pre ye bueno (4€), pero no ye recomendable en pender de os suyos orarios.

Chenta: Cal levar chenta (entropán u parellano) pos micharemos en una de as zonas abilitadas ta felo en o galacho.

Cursa por o galacho: Se ferán cuatro charradetas de a historia de o puesto, a flora, a fauna y a dinamica fluvial de o mesmo. Todas de raso en aragonés, profés.

Atras custions: Ye recomendable de levar chiquetas ferramientas, bomba y bella camara de repuesto ta os que vaigan en bici.
A cursa no esiche un gran ran fisico.
Ye recomendable de levar ropa versátil (polás con chambreta por debaxo, en estar o tiempo variable).
En caso de previsions meteorolochicas de mal orache podría anulase a cursa. Se ninviará o diya de antis un e-mail de confirmación u anulación.

Todas as personas son convidadas a ista cursa, charren u no aragonés, si bien ya se anticipa que toda l'autividá será desembolicada de raso en aragonés.

Ta inscribise (pre gratuito, fueras de o que pueda costar o transporte u a chenta de cadagún) cal ninviar un e-mail a otrango@gmail.com

Primera entrada

2009-10-31T09:50:00.000-07:00

Bienplegaus a o entrastre de o coleutivo 'O trango', naxiu ta esfensa y promoción de a luenga aragonesa.

En iste primer post esplanicaremos o que son as nuestras trazas d'autuación y pensamiento, asinas como as vías de contauto con nusatros y as nuestras aicions.

Os alacez de 'O trango' son os siguiens:

1. O trango naxe ta estendillar socialmén a conoxedura d'a existencia d'a luenga aragonesa y as suyas carauteristicas, promocionar o suyo emplego y reivindicar una millora de a suya situación.

2. O trango fuye de toda mena de politización tanto explicita como implicita.

3. O trango ye una entidá sin animo de lucro.

4. O trango se declara Asociación Transparén, podendo estar presén cualsiquiera intresau en todas as reunions y autividaz de o coleutivo, sin estar menester a pertenexedura a o mesmo. En iste sentiu, se convida a toz os concienciaus con a luenga aragonesa a participaye, independientemén de que sigan u no en atros coleutivos; si bien, en a capacidá de voto y l'orden de parola se dará prioridá a os declaraus socios.

5. O trango criticará cuan calga criticar, dixando a un costau cualsiquier esprito de bien quedar y tenendo como prioridá esplanicar claramente cuála ye a suya postura respeuto a tot o tocán a la luenga aragonesa, sin considerase por ixo entidá "no diplomatica". Asinas mesmo s'aeutarán todas as criticas posibles y se mirará de treballar respeuto a istas.

6. O trango fuye de creyar una estrutura cherarquica interna, autodeclarandose coleutivo asambleyarista. Existirán os cargos de presidén, secretaire y tresorero en estar menester legal, si bien a valura de istos cargos en iste coleutivo será o mesmo que o de a resta de componens, trantandose de una mera custión burocratica.

7. O trango aceutará todas as opinions y ideyas tocans a custions "academicas" en l'aragonés. Asinas, no se estrablexerá ni grafía ni modelo d'aragonés concreto, aceutandose toz istos, en no estar ixa a finalidá de iste coleutivo istas custión.

Primera añada

O planteyamiento de ista entidá en a primera añada de a suya existencia ye o de fer autividaz internas que contribuyan a fortalecer una comunidá de aragonesofablans, o que no quiere decir que os no aragonesofablans sigan excluyius de istas aicions, si bien istas se reyalizarán, u mirarán de reyalizase, de raso en aragonés.

Asinas, l'ochetivo ye de fer autividaz mensual d'esferens menas que permitan a la chen aragonesofablán arroclase y fer servir a suya luenga, y en un segundo plano coordinar a resta d'autividaz feitas por parti d'atros particulás u coleutivos ta que toz sigan enteraus y convidaus.

Si istos ochetivos no pueden reyalizase, o coleutivo buscará atros que sí pueda realizane.

Contauto

O contauto con a entidá 'O trango' se puede reyalizar fácilmen a traviés de o e-mail otrango@gmail.com an que tos podrez enterar de todas as autividaz feitas u ficatos más en o propio coleutivo.